Contoh Carpon (Carita Pondok) untuk SD - BABALIK PIKIR

Ngaran simkuring Budi, budak lalaki kelas opat SD anu umurna kakarak nincak 10 taun. Kuring asalna ti keluarga anu berada, bapak kuring pebisnis jadi tina biaya hirup keluarga kuring parantos cukup jang ngabiayaan dua lanceuk kuring nu ayeuna nincak kelas dua SMA jeung kelas hiji SMP.

Tapi dikarenakeun kuring budak bungsu, jadi kuring tèh badeur tur ngaleyeud lamun di sakola. Ngajèger ongkoh da kuring tèh so jago lamun di sakola. Barijeung otak pas pasan. Sok ngajèger ka budak lalaki nyaèta lamun gelut sok meunangan waè. Kuring gè sok ngaheureuyan budak awèwè, komo deui ka budak awèwè nu ngaranna teh Dèwi, budakna hideung, pèndek tapi gendut. Lamun dibeungkeut sok dikèpang dua. Kuring resep pisan ngahereuyan èta budak kulantaran budak èta mun diheureuyan tara ngalawan, teuing karna ku sieun teuing èmang karna saking ku cicingeun. Kuring ogè penasaran hayang nempo èta si Dewi ngalawan lamun dihereuyan, tapi tara kalaksanakeun. Dewi beda jeung budak awèwè nu sèjènna anu lamun dihereuyan tèh sok langsung ceurik bari jeung bèbèja ka Ibu guru. Padahal mah kuring tèh osok nyebutan jeung sok ngaheureuyan si Dewi. Kuring gè boga sebutan khusus jang si Dewi, nyaèta si 'iteung' kulantaran hideung kulitna.

Salah sahiji poè, kuring keur belajar ipa tapi guruna dipanggil heula ku kepala sekolah. Di kelas tèh barudak garandèng, aya nu ngarobrol, tatalu, nyanyanyian, jeung sajabana. Kuring hariwang ngdèngè na ogè, tapi kuring gè bosen lamun tiiseun. Kuring nempo si Dewi nu keur diuk di bangkuna, katingali na mah keur ngerjakeun soal. Tapi barudak gè geus barèrès ngerjakeun soalna, piraku wè manèhna acan bèrès, da pasti na ogè manèhna pupuraan keur mikir daripada kudu ngagandèngkeun kelas. Ningali si Dewi tèh simkuring jadi boga ide jang ngahereuyan. Kuring ngageroan si Dewi,

"iteung!" Gorowok simkuring. Nu di geroan tèh teu ngalieuk, kalakah pupuraan maca buku. Kuring ngagorowok deui leuwih tarik,

"iteung! Woy iteung!" Si Dewi langsung ngalieuk, berarti sora simkuring tadi teu kadèngèeun ku si Dewi lantaran di kelas gandèng. Si Dewi nempo kuring bari ngaisyaratkeun nanya aya naon kuring ngageroan.

"Ari itu nu di luhur tèh naon?" Tanya simkuring. Si Dewi langsung ningali kaluhur, ka para. Tapi ku lantaran eweuh nanaon, si Dewi ngagideug tanda teu nyaho.

"Ihh coba tempo deui, itu tuuh!" Ceuk simkuring bari nunjuk kaluhur para. Si Dewi ningali deui kaluhur, tapi ngagideug deui da eweuh nanaon.

Kuring nyampeurkeun ka bangkuna. "Itu tempo di luhur aya nu anèh, coba tempo ku manèh kaluhur. Yeuh naèk kana mèja!" Ceuk kuring bari nepuk mèja.

Si Dewi ngahuleng da satempoeunna mah di luhur para tèh eweuh nanaon, ngan bodas hungkul ku warna para bari jeung eweuh nu anèh. "Iyeu coba naèk heula kaluhur, pastikeun èta di luhur tèh aya naon?" Ceuk simkuring deui bari ngèsèrkeun bangku jang naèk si Dewi ka luhur mèja. Tapi si Dewi ngagideug embung.

"Eeehh embung ceunah, iyeu buru naèk heula!" Titah simkuring rada ambeuk jeung maksa. Si Dewi nungkul bari jeung ngagideug da embung. Tapi kuring leuwih maksa, "buru naèk!" Ceuk simkuring rada nyentak.

"Kuring sieun." Tèmbal Dewi.

"Tenang, ku urang dijagaan ti handap. Moal kunanaon da buru, yeuh buru naèk!" Ceuk simkuring ngayakinkeun bari mèrèan korsi ngarah gancang geura naèk. Si Dewi tèh sieun naèk bari jeung sieun oge ka simkuring, komo deui kuring ngomongna rada nyentak. Kapaksa manèhna naèk kana korsi.

Saanggeus naèk kana korsi manèhna cicing da sieun naèk kana mèja nu rada luhur bari jeung awakna anu gendut jeung pèndèk ngajieun manèhna hèsè naèk kana èta mèja. Ku sabab lila teu naèk-naèk kusimkuring dipolototan. Manèhna langsung nungkul nempo dipolototan tèh, langsung wè ugel-ugelan naèk kana mèja. Kuring hayang seuri ningali awak gendut manèhna ngadègdèg bari jeung kahèsèan naèk mèja tur ugel-ugelan.

Sababaraha menit saanggeusna manèhna geus bisa aya di luhur mèja bari diuk, arèk nangtung tapi ngadègdèg palalaur. Tapi saeutik-saeutik manèhna bisa nangtung ogè di luhur mèja sanajan bari ngadègdèg. Manèhna langsung ningali ka luhur para, pas keur kitu tèh kuring langsung ngèsèrkeun korsi anu tadi paragi naèk mèja rada jauh, niat kuring amèh manèhna hèsè turun.

"Woy barudak tempo si Iteung rèk jogèd na luhur mèja!" Gorowok sim kuring, barudak sa kelas nempo si Dewi keur na luhur mèja seuseurian nempo awak gendutna keur cicing na luhur mèja komo arèk jogèd mah.

Si Dewi reuwaseun ngadèngè kuring ngajorowok kitu, komo ditambah deui manèhna ningali korsi nu tadi paragi naèk teh dièsèrkeun rada jauh ku simkuring. Manèhna makin ngadègdèg ningali barudak sakelas keur merhatikeun manèhna, ku lantaran èra manèhna langsung nungkul bari saluruh awakna ngageter.

"Buru joged! Nang ning ning nang euung nang ning ning nang euung!" Ucap simkuring bari meragakeun joged nu teu paruguh. Barudak seuseurian nempo simkuring ngahereuyan si Dewi nu keur ngadègdèg di luhur mèja. Beungeutna nu hideung jadi beureum ku lantaran èra ditempokeun ku barudak.

si Dewi nyoba arèk turun, tapi mèja na ku kuring diendagkeun. Manèhna jadi sieun rèk turun kulantaran sieun ngagubrag tina luhur mèja.

"Joged! Joged! Joged!" Gorowok barudak sakelas babarengan nitah si Dewi ngarah geura jogèd. Tapi manèhna kalakah cicing we na luhur mèja bari ngadègdèg da èra ditambah deui sieun rag-rag da ku simkuring mèja na di endag waè. Ningali manèhna kasieunan kulantaran mèjana diendag waè ku simkuring, barudak tèh seuseurian. Komo ningali awak gendutna ngadègdèg, ditambah deui beungeutna nu beureum pisan saking ku èra.

Ibu guru ujug-ujug datang ka kelas, barudak termasuk simkuring langsung diuk na bangku sorangan bari ninggalkeun si Dewi nu masih nangtung di luhur mèja. Manèhna teu bisa turun kènèh da paur mun teu makè korsi mah.

"Dewi nuju naon di luhur mèja?" Taros Ibu guru nu keur kahèranan tur reuwas.

"Dewi tadi tèh badè joged na luhur mèja Bu." Tembal simkuring

"Aduuh nanaonan atuh? Ènggal turun!" Ceuk Ibu guru.

"Awakna gendut Bu jadi hèsèun turun." Tembal simkuring.

Barudak seuseurian ngadèngè ucapan simkuring. Ibu guru langsung molototan kuring terus ngabantuan Dewi turun tina mèja. Dewi langsung diuk na korsina bari nungkul, kaciri beungeutna beureum kènèh kulantaran èra. Kuring ngarasa puas geus ngajailan si Dewi, di jero hatè mah kuring tèh keur seuseurian nginget-nginget awak gendutna tadi keur ngadègdèg di luhur mèja.

Pelajaran dilanjutkeun deui nepi ka waktuna balik ka imah. Pas rèk kaluar kelas kuring ngahaja ngagèdor si Dewi bari ngomong, "teung engkè joged deui nya! Hahahahaa" kuring seuseurian bari ngalèos kaluar kelas.

Pas di jalan balik tèh langsung ngaberedeg turun hujan gedè pisan, tapi ku lantaran hujanna turun pas kuring geus nepi gerbang perumahan, kuring langsung lumpat ka imah. Tapi ku lantaran buru-buru lumpatna bari jeung tarik kuring teu ngahaja nincak taneuh anu legok nu isina cai nu keur ngaguyang. Atuh kuring tèh langsung labuh da tikosèwad abus kana guyangan cai hujan. Suku kuring langsung getihan ngucur saking tarikna labuh da dina kaayaan keur lumpat tarik. Kuring teu bisa nangtung da nyeuri teu kuat, ditambah deui eweuh sasaha anu bisa dipènta panulungan. Teu karasa kuring tèh nètèskeun ci panon da teu kuat nyeurina.

Lila kalilaan datang Dewi mayungan simkuring, tuluy ngabantuan simkuring nangtung. Kuring awalna embung tapi mikir deui dari pada kuring huhujanan di tengah jalan bari jeung suku ngucur darah. Kuring akhirna dibantuan jalan nepika imah, da kuring kakarak inget lamun imahna tèh tatanggaan jeung kuring. Di jalan tèh manèhna teu ngomong nanaon. Teu kaciri ogè amekna gara-gara tadi di kelas. Manèhna nulungan kuring tèh ikhlas, padahal mah kuring tadi geus ngaheureuyan manèhna.

Nepika imah kuring jadi èra sorangan, komo deui manèhna pasti nempo kuring ci panonan. Kuring ogè jadi ngarasa bersalah salila iyeu geus ngaheureuyan manèhna waè. Kuring teu bisa ngabayangkeun lamun manèhna boga rasa kaamek, bisa-bisa manèhna moal ngabantuan simkuring, jeung teu kacipta ripuhna lamun simkuring teu dibantuan, pastina ayeuna tèh kuring masih di tengah jalan bari ingsreuk-ingsreukkan ceurik nganahan rasa kanyeuri. Kuring nganuhunkeun pisan ka manèhna kulantaran geus nulungan simkuring. Kuring janji ka manèhna moal ngajailan manèhna deui. Manèhna teu ngajawab omongan simkuring, salain ngan saukur seuri hungkul. Kuring reuwas kulantaran saprak sakelas kuring tara nempo manèhna seuri sabab ku kuring diheureuyan waè. Ari manèhna teu mupuas simkuring pas keur kasusahan ngalainkeun kalakah nulungan.

Mutiara L. Pergiwa

14316 11111

PGSD C